تكاليف الزواج

موضوع: تكاليف الزواج الأحد مايو 24, 2009 4:27 pm

اممم

طيب انا ممكن أقولك كل حاجة بتتكلف من كام لكام

يعني مثلا

زي ما كلنا عارفين السوق فيه حاجات مثلا زي الأنتريه

هتلاقي فيه بـ 2000 جنيه

وبرضه هتلاقي بـ 10000 طيب إيه الفرق؟

أكيد الفرق بيكون في الخشب والجودة ونوع الأنتريه اللي هتشتريه

وعايزة أقول على نصيحة للناس اللي في المتوسط فما أقل

يعني كلمتي مش للناس اللي مش فارق معاها

فيه محلات زي in & out

المحل ده جامد جدا لكن لو هتشتروا يبقى من مكان تاني لسبب

اه ممكن تكون بتاخد حاجة جودتها كويسة ولها سمعة

لكن في نفس الوقت انت بتدفع تمن شهرة المحل

بمعنى ان المحل له إسم وسمعة ودي انت بتتكلفها فوق سعر الحاجة نفسها

فيستحسن نبعد عن الماركات لأنها مكلفة زي برضه American Furniture

لكن ممكن تلاقي حاجات رخيصة بس هتكون لقلة الخشب فيها مثلا زي الأنتريهات المودرن

الصالون

بيتراوح سعره من 3000 حتى 10000 جنيه مصري والله أعلم يمكن فيه أغلى ده أكيد

طيب ليه؟

ده الصالون المدهب

فيه شغل بيتعمل بخشب أي كمان ومش بيستحمل زمن بصراحة

وفيه شغل بيتعمل بخشب زان ودهب فرناوي وحاجات كده بتكلف فيه أكتر

يعني لو هنجيب حاجة بخشب نضيف وتكون مش مليانة دهب أوي ولا أويمة جامدة
(الأويمة اللي هي الشكل اللي بيتحفر على الخشب)

يبقى ممكن يكون في حدود 5000 جنيه

والصالون ده اسمه لويس

ده يعتبر من أرخض الأنواع لأنه مافيهوش شغل كتير وهادي وصغير

ودي صورته

تكاليف الزواج 2_154_M

اللي هو بتكون كراسيه مفرغة زي ماحنا شايفين

لكن فيه صالون تاني مش فاكرة اسمه بصراحة لكن أكيد شوفتوه

وهو ده

تكاليف الزواج 13_396_M

ومش ده الشكل الوحيد منه فيه أشكال كتير جدا طبعا

زي ده مثلا

تكاليف الزواج 166253

بس الفكرة انه مش مفرغ زي لويس يعني هتلاقي معاه مدافع وشلت وهو بشلت

(شلت جمع شلتة اللي بتتحط على الكرسي)

وطبعا كل ماكان الشكل ضخم ومليان خشب كده ودهب هيبقى أغلى

والغالي اللي ممكن يوصل 15000 ويمكن 20000 زي ده

تكاليف الزواج 21_125_M

الله الغني عنه طبعا تكاليف الزواج Intello

وده سعره بيتراوح من 6000 وانت طالع
وبرضه لو هنقول الكويس منه ممكن نلاقيه بـ 6500 دي أقل حاجة كويسة
والأقل جودة ممكن تلاقيه بـ 5500 أو 6000 ومش هيكون كله خشب زان
وربما مايكونش فيه زان خالص

فيه شارع في دمياط اسمه شارع عبد الرحمن

الشارع ده مشهور بالحاجات الرخيصة
لكن بيتقال عليه انه فيه بواقي شغل وشغل مش جودة عالية لكن بيمشي

الشارع ده من ناحية المستهلك اللي عايز حاجة رخيصة هيلاقي
لكن جودة متوسطة ويمكن أقل من المتوسطة

لكن من وجهة نظر التجار بيقولوا عليه
"التاجر الكويس مايمشيش هناك
عشان كده بيسوأ سمعته لأن هيقولوا عليه شغله اتضرب
ومش عارف يبيعه فبيوديه الشارع ده"

نفس النظام بالنسبة للمناصرة اللي في القاهرة
شغلها في متناول ناس كتير لكن مش الجودة العالية (يعني ممكن نقول شغالة)
تلاقي تربيزة مش ثابتة مثلا في مكانها أو خشب مش هو عادي

أوك كده؟

موضوع: رد: تكاليف الزواج الأحد مايو 24, 2009 4:30 pm

نيجي بعدها للسفرة

السفرة تلات قطع

هيعتمد بقى انت عايز بس سفرة ونيش؟ وللا هتاخد البوفيه معاهم كمان؟؟

لو سفرة ونيش هتتراوح السفرة من 5000 لـ 13000 جنيه

وفيه أغلى بكتير بس ده المتوسط

أنا عن نفسي شوفت تربيزة سفرة لوحدها بس بـ 9000 جنيه

كانت تحفة بس طبعا مش في متناول الشباب اليومين دول

السفرة الكويسة ممن تلاقيها بـ 6000 بس هتكون التربيزة مثلا صغيرة مش كبيرة

وبـ 6 كراسي مش 8 وده المنتشر اليومين دول

نيجي للسفرة اللي بالنيش والبوفيه

دي بتبدأ من 9000 لـ 17000

والكويس منها ممكن يبقى بـ 10000

برضه حسب حجمها والشغل المعمول فيها

نجي بعد كده للمطبخ

وده ماقدرش أقول سعر محدد ليه

لأن سعره بيعتمد على حاجات كتير

أولا مساحة المطبخ أد إيه؟؟ وهل انت هتعمله ألومنيوم وللا خشب؟
ولو خشب هتاخد خشب نوعه إيه؟؟

طبعا نسمع عن مطابخ عمرو حلمي

بس دي سعرها بيبدأ من 12000 جنيه المطبخ الصغير وده حرام يعني
(بنتكلم عن شباب في بداية حياته)

زي ماقولت بتدفع تمن الشهرة والسمعة والإسم

يبقى نبعد عن قبنوري وعمرو حلمي لأن برضه قبنوري يعتبر غالي

ليه؟

هو مش غالي على خاماته يعني قبنوري تمنه فيه
لكن فيه حاجات كتير ممكن نجيبها ونعملها خشب من غير الحاجات دي

زي مثلا شوية تكنيكات طالعة جديد للدرفة بتاعت المطبخ

كل تكنيك فيهم ممكن يتكلف لوحده 1000 جنيه

زي مثلا انك تفتح الباب بتاع الدرفة بطريقة مختلفة

أو إنك تلاقي الباب بيفتح وتفتح معاه سلة فيها الحاجات بتاعتك
اه بتوفر في المكان وشكلها حلو لكن مش موفرة في الفلوس

في الغالب متوسط متر المطبخ في الخشب بيكون 700 جنيه
(عمولة يعني حد يعملهولك ودي تكلفة الخشب بعمولة النجار)

وحسب بقى هتاخد كام متر

ده غير الرخام بس مش متذكرة الحقيقة الرخام بكام للأسف

إيه تاني كده؟

اه

غرفة النوم دي أهم حاجة

هتلاقوا منها كتيييير

وبرضه دي فيها كذا حاجة

السرير والدولاب دول الأهم

وفيه معاها 2 كومودينو ومعاها تسريحة
وكمان شفنيرة (حاجة شبه بوفيه السفرة بس للهدوم)

الشفنيرة مابقتش موضة اليومين قليل لما تلاقوها خصوصا مع صغر حجم الشقق اليومين دول

وبتتعمل بالطلب فخلونا نركنها على جنب

نيجي للسرير والتسريحة والدولاب بالكومودينو

دول ممكن يتكلفوا حوالييي من 5000 لـ 35000

طبعا سيبنا من الـ 30 و35 ألف دي أوض مستوى تاني وشغلها عالي جدا جدا جدا

بس طبعا مكلفة وفي الآخر هتأدي نفس الغرض
(لكن مع شوية منظرة)

أوض النوم الكويسة سعرها هيبدأ من 10000
وفيه بـ 12000
يعني ده متوسط الشغل الكويس من حيث الجودة

وخدوا بالكو من حاجات كتيييييير بنشوفها

كوارث بمعنى أصح

كتير جدا من النجارين منعدمي الضمير بيعملوا إيييه؟؟

الأوضة اللي معمولة بخشب الزان بتكون تقيلة

ده بقى بقوم عامل إيه؟؟

يجيبلك خشب قشرة وللا أي نوع

ويحشيه حاجات تانية

وماأدراك ما الحشو
له أنواع (آه أمال انتو فاكرين النصب كده بالساهل؟ تكاليف الزواج 40

)

حشو معمول بأسفنج متغرق غراء (الغرة البيضا دي عشان يتقل)

حشو آخر وهو الطوب (الطوب الأحمر اللي احنا عارفينه ده)

حشو رمل وفلين مثلا

(لا ماتستغربوش فيه حاجات تانية بس لسة أخبارها ماوصلتنيش)

فخدوا بالكو لازم تكونوا بتعملوا العفش عند حد موثوق منه تماما

نيجي للأجهزة الكهربائية
التلاجة 14 قدم إيديال زانوسي والغسالة إيديال زانوسي أكواتك 14 برنامج
البوتاجاز يونيفرسال وسخان إيديال

الكلام ده ممكن يعمله حوالي 8500

وطبعا فيه ماركات أقل بس أنا بقول على الأفضل جودة والمتوسط

الشقة ليها مواااال آخر

تشطيب الشقة لوحده نقاشة حسب مساحة الشقة

دهان بـ 6 جنيه المتر والسيراميك بـ 10 جنيه المتوسط يعني لو فيه لعب في
شكل السيراميك ممكن يكون أغلى ولو مافيش خالص ممكن تنزل معاه لـ 8

دي المصنعية فقط ولسة أسعار الدهان وأسعار السيراميك

أنا لسة عندي حاجات كتير معتمدة على نوع التشطيب والشقة

لو عندك استفسار معين عنهم قولي

ولو أي حد عنده أي استفسار يقولي

معلش طولت عليكو

سلام

تسلم يا كور بجد معلومات مهمه قوى واستفدت منها وهبئا بردو اقول لخطيبى

بس استغربت من موضوع الحشو ده انا سمعت انه ممكن يغشك فى الخشب اذا كان انتريه او نوم اى حاجه ويغيره بخشب صناديق وده بيبئا رقيق قوى وفى ناس اعرفهم اضحك عليهم واكتشفو بعد لما جم يحركوه من مكانه اتكسر ولما جابو نجار هو اللى قالهم على خشب الصناديق ده وقراتها فى الجرايد من فتره
وبعدين مفيهاش حاجه لو جبناه الحاجات البسيطه وتكون الخامه كويسه عادى اننا نبدأ حياتنا كده ما كل حاجه بعد كده بتتغير
ما اهالينا اهم غيرو كل حاجه فى شقتهك
يا ريت يا كور لو عرفت اى معلومه تانيه قولنا

ربنا يعينا على المصاريف دا كلها ..
تسلم يا كووور على المعلومات الهامة دي ,, لكن للمصريين فقط ..ههههههههه