القرش الابيض ينفع فى اليوم الاسود

[center]السلام عليكــم ورحمـة الله وبركاتــة ،،

ازيكم يا شباب ....

موضوعى النهارده ... بيتكلم عن المستقبل .. او بمعنى أصح .. عن مستقبلنا احنا ..

أهالينا ... عايشين عشاننا ... الاب والام .. بيعيشو حياتهم كلها علشان يأمنو مستقبل اولادهم ..

الاب يتغرب .. والام يطلع عنيها فى تربية الاولاد لوحدها .... ومبيتمتعوش بالفلوس دى .. عشان اولادهم يتمتعو ..

ويقولك القرش الابيض ينفع فى اليوم الاسود ... ماشى كل ده جميل ....

لكن المشكله فى الاب ... اللى بيشتغل ومتغرب ... ربنا يفتحها عليه .... يبدأ يخبى عن مراته مرتبه كام ..

ومعاه كام فى البنك .. وفى بنك ايه .... ولو كان اشترى ارض ... محدش يعرف طريقها غيره .. وعقودها كلها عنده فى الخزنه ...

ويقولك انا مضمنش اعرفهم انا معايا كام .. مراتى تطمع فيا والاولاد .. لا انا خلينى مستخبى كده .. وكفايه ان الى هما عايزينه بياخدوه .. وعايشين احسن عيشه ..

ولاقدر الله يوم ما ييجى اليوم الاسود .... فجأه ... لا يلحق يعمل وصيه .. ولا يلحق يعرف حد مكان فلوسه واملاكه ..

وتحتاس مراته ياعينى هيا واولادها ... طبعا فلوسه بره محدش يعرف يجيبها ... وياعالم الناس الى بره دى هتبعتها ولا لأ ... ولو بعتوها مع حد من اصحابه .. مين قال انه هيبقى أمين فى الزمن بتاعنا ده ..

واملاكه واراضيه وعقودها .. يا ترى هيوصلولها ازاى ...

كل دى مشاكل بيتعرض ليها اولاده ومراته ..

السؤال بقى ... انت هتخبى عن مراتك ولا هتبقى كتاب مفتوح وهتبقى هيا سرك ...

ولا هتخاف وتقول لا ياعم لتطمع فيا ....

هل تقبل تعمل لمراتك توكيل عام بكل حاجه ..

ولا تقل وانا ايه ضمنى انها ما تكتبش كل حاجه باسمها ...