دايما بتلاقى الولاد والبنات مقسومين فريقين فى موقفه من الحب
الفريق الاول يقولك انا مش ممكن اتجوز الا اذا عشت قصة حب قبل الارتباط الاول..
والفريق التانى يقولك لا انا مش ممكن احب الا اذا اتجوزت
وكل فريق له مبرراته وله دوافعه انه ينتهج النهج اللى ماشى عليه
ونشوف مع بعض كل فريق بيقول ايه
*=*=*=*=*=*=*
الفريق الاول او النص الاول(ودى الفئة الاكبر بكتير ) يقولك انا لن اتزوج حتى احب
ومن بعض مبررات النص ده ... الاتى
*=*=*=*=*=*=*
(1)
تلاقيه اول لما يدخل عليه سن المراهقة خماشر تماشر سنة كده يعنى
وحس ان السبايكى ممكن يتعمل
وان البنطلون سقط لركبته (طبعا اوتوماتيك مالهوش يد فى تسقيطه) يقولك بس
انا اشوفلى بنت احبها عشان انا مشاعرى زادت وغطت وشوية ممكن مشاعرى تسد البلاعة بتاعة حمام بيتنا
انا لازم اشوفلى بنت احبها عشان اكمل الاستايل وبعدين ربك يساويها واخطبها ونتجوز
والبنت تقولك بقى ... انا نفسى اعيش قصة حب زى تيتانيك .. واسمع اليسا وهى بتقول
جوايا ليك احساس بيكبر كل يوم
من كتر شوقى باخد برشام قبل النوم
وتقولها شوشو ولولو .. ياااااااى ياااااااااى ... ياى يانفيسة على الحب ولوعه ووجعه
واشواقه ومراره وجنته وناره... ياااااااى .. ياااااااى يا نفيسة فايتك نص عمرك وانتى راهبة كده .. جاتك نيلة مليتى البلد
نفيسة بقى تتجن وتطلع ناكشة شعرها وعنيها بتضرب شرار وحواجبها تتقلب تمانية
وتقولك سبونى ... سبووووووونى .. سبونى سبونى سبونى ... الحلو ده يملى عيونى
سيبونى اجرب .. اعطونى حريتى اطلقوا يديا
وطبعا نفيسة تطلع الشارع تلاعب حواجبها للواد زيكا اللى لسه بدوره مسقط البنطلون وعامل السبايكى طازة
عايزة تجرب اللى لولو وشوشو جربوه .. حتى لو ماكنش نابع من جواها انها تجرب
ممكن تكون عايزة تجرب للتقليد
او من باب الفضول
ويمكن زيكا عجبها برضه (منك لله يا زيكا واخد مننا البنات)ا
*=*=*=*=*=*=*
(2)
تلاقى بقى الشباب اللى يدافع عن وجهة نظره ويقولك
ياعم الحالة ضنك وكوباية المية السخنة (الشاى يعنى) بقت بجنيه وربع فى قهوة مافهاش كراسى
هنعمل ايه طيب احنا
ياعم البلد رايحة فى داهية
هو بقى فى جواز فى الظروف الاقتصادية اللى بنعيشها دى ؟؟
عايزنا مانحبش الا لما نتجوز ...؟؟؟ يعنى نفضل لسن الجواز من غير حب ؟؟؟ .. حرام عليك بجد حرام عليك
وتلاقيه ابتدت ملامح وشه تتغير واحتمال لو مامشتش قدامه فى خلال دقيقتين .. هتتحول لدادة شايلة طفل بتقوله ننة هووووة
والبنات بقى يقولولك ..ده كل صحابى وصحباتى معاهم بوى فريند وجيرل فريند
وانا مش عايزة واحدة نمامة.. وامها شبه الشمامة.. تقول عليا انى رجعية (بتمشى بضهرها يعنى .. رخصتها على ورا)ا
او يتهمونى بالتخلف لو قلتلهم لا ماينفعش احب قبل ما اتجوز
او احس بالغيرة منهم ويجيلى فوران دم
اواحس انى اقل منهم
اويعايرونى انهم قدروا يعملوا علاقات وانا لا
كأنى فيا عيب
مع انى اجمل منهم مية مرة
والف شاب كل يوم بيبصلى(من عينة زيكا برضة )ا
*=*=*=*=*=*=*
(3)
تلاقى منهم برضه يدافع عن وجهة نظره ويقول
لازم نعرف بعض كويس .. ولازم نقعد مع بعض اطول فترة ممكنة ..عشان نفهم بعض
فترة الخطوبة سنتين مش بتكون كافية لوجود علاقة حب افلاطونية
ولا كافية لضرب عدد قياسى فى عدد كياس الترمس اللى هناكلها ع البحر
ولا كافية لضرب رقم قياسى فى عدد الخناقات بينا
ولا كافية لضربه هو شخصيا
عايزين حب افلاطونى مدته خمس ست سنين على الاقل قبل الارتباط
*=*=*=*=*=*=*
(4)
من اقوى مبرراتهم بقى يقولولك
بنقولك ايه
بابا وماما عارفين ... احنا مش بنعمل حاجة فى الضلمة
*=*=*=*=*=*=* *=*=*=*=*=*=*
اما عن النص التانى(ودى الفئة الاقل بكتير وكلامها عقلانى شوية ) يقولك انا لن احب حتى اتزوج
ومبرراته فى كده
*=*=*=*=*=*=*
(1)
الشاب تلاقيه يقول احنا نستحمل حالة الضنك والظروف المنيلة وتأخير الجواز ربنا يعينا عليه
احسن ما نتحمل الم اشد الا وهو الم الاستمارة ونعمل زى عبد الشكور (واحد صاحبه ماتعرفهوش) ونحفظ مشاعرنا للى يستحقها
والبنت تقولك لا انا احافظ على مشاعرى واستحمل لحد ما اوهبها للى يستحقها
واللى ييجى البيت من بابه
مش للى بيتلصصوا مشاعرنا وياعالم يعملوا فيها ايه
شايفين انهم كده بيحافظوا على مشاعرهم وعلى نفسيهم
*=*=*=*=*=*=*
(2)
وبالنسة لقصص الحب الافلاطونية .. احنا راضيين بفترة الخطوبة وكمان مانتمداش فى مشاعرنا اوى
يمكن تحصل حاجة والموضوع يتفركش عشان مانتعبش
ما نتمادش فى مشاعرنا الا لما نتجوز
عشان يبقى كل طرف ادبس فى التانى والحمد لله
وهما سنتين تلاتة خطوبة كافيين للحكم على اى علاقة ومدى نجاحها
*=*=*=*=*=*=*
(3)
بالنسبة بقى لمعرفة الاهل يقولوا
مش معنى ان بابا وماما موافقين وعارفين بكل حاجة
يبقى اللى بنعمله صح .. لانهم مهما عرفوا اكيد فى حاجات هتستخبى عنهم
وحتى لو مافيش حاجة استخبت عليهم
يامة اهالى بتوافق اولادهم فى حاجات مش صح
رساله
