تايتنك السودانية

تايتنك السودانية

كنت خارجا في تلك الساعة من الليل من زريبة نومي لاستقي القليل من الماء حين التقتطت اذناي المدربتان تلك الحركة

الخفيفة.............. اخذت انفض اغشية الظلام من امامي فإذا بها جدتي تجلس فوق كرسيها الهزاز تتأمل النجوم .......

اقتربت منها حتى رايت انعكاس ضوء القمر فوق الدموع التي كانت تسيل على خدها.....

" مالك ياحبوبة؟"

"مافي شي"

"كيف مافي شي ، المارق من عيونك ده ملاح؟ قولي لي في شنو؟"

وبعد الحاحي الشديد................."وااااااااااااي اتذكرت الحبيب"

" الحبيب؟؟؟؟؟؟؟ ياحبوبة انتي كراع جوه وكراع بره تتذكري لي الحبيب! اتذكري القبر"

" لكن انت ماعارف قصتو"

" اها نسمع قصتو"

عاد بنا الزمن الى الوراء ستون عاما...............

" يلا ياشباب شدو الهمه ده حيكون اكبر بنطون في الشمالية كلها.... يلا هاكم اشربوا الريد بول ده حيديكم جوانح" كان

هذا مالك البنطون.... بعد انتهاء العمل وتجهيز البنطون للقيام بأول رحلة له تواجد في المكان عدد كبير من ناقلي

الشمارات لنقل شمار هذا الحدث الجلل الى الحلة المجاورة.

صعد الركاب البنطون واعلن القبطان عبر مكبرات الصوت عن انطلاق الرحلة " يا خوانا انا سواق البنطون دا عليكم

الله زحوا لينا من الدرابزين يادوب ضاربينو بهية وبالله كل زول يقعد لينا في مكانو الفوق فوق والتحت تحت ما تلخبطوا

لينا الرصة..... أي عليكم الله خلو الزول يعرف يشتغل... مع تحياتي"

في الليل وبعد خلود الركاب الى النوم خرج ذلك الشاب الشرامي من ركلب درجة (قريعتي راحت) فوجد تلك الفاتنة تقف

على حافة البنطون تهم بالسقوط..

" عاينو العويرة دي ... عليك الله دا وكت عوم اسه"

" ياغبيان انا دايرة انتحر الحقني سريع"

" الحقك لي شنو؟ مادام دي رغبتك وجايبة فيها مجموع كويس... خلاص"

وانتهى هذا الجدل بسباق بالتفل حيث استطاع ذلك الشاب ان يصطاد خمسة سمكات بهذه الطريقة .

" اسمعيني تعالي اوريك طريقة نقيس بيها طولي وطولك"

" هاهاهاهاها.... والله انت لزيز، اها يلا وريني"

" افردي يدينك وانا بفرد يديني وبقيف وراكي واليدينو اطول يبقى هو الاطول"

"ياي ظريفة شديد اللعبة دي، انا اتكيفت منك خالص"

" اها يا الخفيفة"

هنا علا صوت القبطان مكبرات الصوت : " يا خوانا والله انا كنت سكران وشفت لي حاجة كبيرة قدامي ما اشتغلت

بيها، المهم اسة الحاجة دي طلعت صخور كبيرة وحنطقش فيها والبنطون ده حيغرق يعني انتو حتموتو حتموتو... بس

حبت اكلمكم.. يلا مع تحياتي"

"سجمي يا......... صحي بالمناسبة نحن ما اتعرفنا ما قلت لي اسمك منو؟"

"ياخي بلا اسم بلا فعل ارحكي نتلب اسه البنطون دا حيغرق"

"وب علي ووووووب علي، كويس استناني البس توب وأجيك"

"توبك؟؟؟!! كويس برجاك في الموية"

"لا لا خلاص نتلب سوا"

وقفز الاثنان في الماء...

"بتعرفي تعومي؟"

" تعومي منو؟؟"

" تعومي كامبل... انتي عويرة ولاشنو.. بتقدري تسبحي؟"

" لا"

كويس متلبة معاي مالك؟ خليتيني استناك ساي... يا سلااااااام!! .. هاكي اطلعي فوق الخشبة دي"

" وب علي يا انت الموية باردة"

" اجيب ليكي بطانية"

" يا انت اوعى تسيب يدي عشان اكون مطمنة "

" كويس، اسه انتي فكيني عشان انا حعوم للناحية التانية واجيب مركب واجي انقذك"

" كويس يل بطلي حستناك"

.................................................

" اها يا حبوبة حصل شنو بعد داك؟؟"

" لي يوم الليلة ما جا يا ولدي.... ياربي يكون ما لقى المركب لسه؟!"

منقول