حمله كفايه كده هجــــــــر للقـــــــــــــــرءان (يلا شارك معنا)

بسم الله الرحمن الرحيم
--------------

السلام عليكم ورحمة الله وبركاته

دلوقتى كتير منا بقى مهموم وشايل الهم على طول

بالرغم انه لسه شاب ولكنه تحس انه عنده 50سنه وشايل الهم

عارفين ليه علشان احنا للاسف بعدنا عن ديننا

وهجرنا القرءان الكريم اللى هو منهج حياتنا وسبنا سنن الرسول صلى الله وعليه وسلم

اللى هى طريق الخلاص والهدايه والراحه فى الدنيا والاخره

كفايه بقى كده.... اللى احنا بنعمله ....لازم نفوق بقى العمر بيجرى واحنا نايمين مستنين الموت يفوقنا من الغيبوبه ديه ولما نفوق يبقى خلاص مفيش رجعه

علشان كده حبيت نعمل حمله كفايه كده هجر للقرءان

الفكره ديه الحمد لله بنفذها انا واصدقاء ليا على النت بالرغم انى ماعرفهومشى شخصيا يعنى ماقبلتهمش وجه لوجه قبل كده

بس الحمد لله اتكلمنا واتصاحبنا واتفقنا على طاعه الله

فقلت اقولكم على الفكره ممكن حد يدخل معانا ونشجع بعض

الفكره اننا قررنا اننا نقرأ جزء واحد من القرءان فى اليوم بالرغم انه فيه ناس بتقرء جزئين واكتر

بس قلنا جزء واحد علشان برده الناس ماتملش وكمان يبقوا مواظبين عليها

يعنى احنا هنا فى الجروب ده كل واحد يدخل يقول انا حشارك معاكم مثلا وبدءت وقرءت جزء النهارده

من سوره كذا لكذا او من ايه كذا لكذا

ومش شرط جزء من القرءان المهم انك مايفتشى عليك يوم والا وانت فاتح كتاب الله وتقرء فيه
كفايه بس تدخل وتقول انا قرأت النهارده من القرءان
وشويه شويه حيبقى جزء وجزءين كمان

بس يلا نشجع بعض ونفوق بقى ونجعل القرءان ده شىء اساسى فى حياتنا

يلا روح اشترى مصحف صغير وخليه فى جيبك او فى شنطيتك
يلا بقى كفايه كده خراب للقلوب
كفايه كده لعب الشيطان بينا
كفايه كده حب فى الدنيا ويلا نحب الاخره شويه

يلا نشجع بعض ونبدأ من هنا

يعنى واحد لما يدخل ويلاقى ان فيه ناس بتقرء ومحافظه على القراءه

فاكيد هو برده حيتشجع ويدخل معانا وهكذا

طبعا انا مش حقول ايه فايده قراءه القرءان علشان اكيد كلنا عارفين يعنى ايه يبقى انت محافظ على قراءه القرءان

يعنى بتقرء الرسايل من الله ليك
يعنى بتقرء منهج حياتك
يعنى الخير والرضى فى القلب
يعنى الحسنات الكتييييييييييييييييييييير اوى اللى بتخدها
يعنى رضى الله عليك
يعنى ويعنى .................... حاجات كتير محتاجه توبيكات
علشان الواحد يتكلم عنها

ده مش موضوعنا علشان ماطولشى عليكم

تحذير هااااااااااام

احذر من هجر القرآن ( وقال الرسول يارب إن قومي اتخذوا هذا القرآن مهجوراً ) وهجر القرآن أنواع :
1- هجر تلاوته .
2- هجر العمل به .
3- هجر الحفظ .
4- هجر التحاكم إليه .
5- هجر الاستشفاء به .
6- هجر تدبره

انا عارف ان فيه ناس حتدخل وتطلع تانى وتقول ياعم
لما يجى رمضان ابقى اقرء القرءان
يعنى انت ضامن اوى انك حتعيش لرمضان علشان تقول كده
ماتيجى نختم القرءان قبل رمضان
ولما يجى رمضان نختمه كمان
ولما يخلص رمضان نختمه كمان

يعنى ماهو رب رمضان هو رب كل الايام والشهور

ليه ماتجعلشى القرءان الكريم شفيع ليك يوم دين
ويكون ليك مش عليك ويكون ليك نور فى الدنيا والاخره
ليه مايكونشى القرءان الكريم ربيع قلبك وزوال همك وانشراح صدرك

الكتير منا الايام ديه بالرغم انه لسه مدخلشى حياه الاسره والمسؤليه ولكن تلاقيه شايل الهم ومضايق على طول ومغموم ويبان عليه علامات الكبر

عارفين ليه علشان للاسف قلبه بقى مشغول بالدنيا وبعد عن ربه وعن دينه

يلا بقى كفايه كده هجر للقرءان وكفايه كده بعد عن الدين

احنا ربنا اعزنا بالاسلام فلما بعدنا عنه اصبحنا اذلاء فى الارض زى ماانتم شايفين

دلوقتى بدل ماننشر ديننا على غير المسلمين بقينا دلوقتى بنحاول ونجاهد اننا ننشره بين المسلمين
متخيلين الموقف

وربنا يهدينا اجمعين

وان شاء الله لو الفكره عجبتكم يبقى ممكن تضعوا فى توقيعتكم لينك و شعار

كفايه كده هجر للقرءان

والحمله حتبدء من النهارده
27
رجب يعنى يوم الاسراء والمعارج
حتى ولو واحد بس اللى شارك او مفيش حد شارك ان شا ء الله نكمل فى الحمله ديه
توكلنا على الله

ومستنى مين اللى حيشارك معانا

-=-=-=--=--=-=-=-=

وانا ياجماعه شاب عادى جدااااااا
مش تبع اى منظمه انا شاب عايز حد يساعده ويساعد الاخرين على الاستمرار فى المواظبه على قراءه القرءان

فيلا نشجع بعض ونقف جنب بعض

صح والله جه فى وقته الكلام ده فعلا
لازم كلنا نلتزم بقراءة القران فى شهر رمضان
وبعد رمضان كمان
يارب قدرنا
ربنا يجعله فى ميزان حسناتك
/ ميرسى زيدان /