زائر زائر
| موضوع: رأى فتاة فى الحب الجمعة يونيو 13, 2008 6:01 pm | |
| مش عارفه ليه دايما باصه لكلام الحب باللى بيتقال على انه كلام اهبل , تحسه كده كلام ملزق و اساسا بقي مستهلك و فى منتهيي الملل و اصلا يعني اصلا مش بيدوم, يعني شويه تفاريح كده و بعدين بخ , ليه مبقاش فيه تجديد فى الخطاب العاطفي !!!؟؟؟ العالم ديه مبتزهأش ؟؟؟ نفس الكلام بتاع بوسي و لا نجلاء فتحي, حبيبي , مقدرش اعيش من غيرك , على اساس انه انبوبة اكشجين مثلا, حياتي من غيرك مالهاش معني , و هو بقي اللى فك الطلاسم !!!!! و لا مانمتش طول الليل , ليه عالم صايعه مواراهاش شغل!!!!!! لأ و كله كوم و موضوع النجوم ده كوم , نجوم ايه ديه اللي بتتعد يا خويا و قال ايه اجيب لك نجمه من السما , اهبل ده و لا ايه!!!!! لا و الفاقعه انا باعمل كل ده عشانك , يعني انت لو مكنتش عرفتني مثلا كنت حتبقي صايع من غير شغل و لا عندك هدف لحياتك الا لما تلاقيني !!!! طيب فرضا مقبلتنيش كنت حتبقي مقضيها مهيصه طول الوقت!!!!! صباح الاشتغال ايه الزهق ده!!!! فانا قلت ايه , يا بت يا أزأز لو اتنيلتي و حبيتي واحد , ماهو حيبقي واحد يعني , حتقولي اييييييييييه ؟؟؟؟ يلا اهو هذه تجربه برضه و محاوله بسيطه لتجديد الخطاب العاطفي و اهو كله بثوابه ازيك يا برنس ؟؟؟؟ بلكونة قلبي يا ناس !!!!!!,من ساعة ما الظروف حدفتنا على بعض و تحس كده فيه طراوه على حياتي , قبل ما اعرفك كانت حياتي منتهي منتهي الصهد مفيش نسمه حلوه, يا خرابييييييييي يا جدعاااااان!!! كانت حياتي كلها اغسطس بحره و رطوبته و تلزيقه و خنقته لا و كمان بسحابته السودا, انت اللي كيفت المسائل تقولش تكييف كاريير تلاتين حصان, لا و يا سلام لما كل ده فى اغسطس و تيجي تستحمي تلاقي المياه مقطوعه يا موتور مية عمري انت بالك انت حداشر سبتمبر ؟؟؟؟ اهو انت كنت حداشر سبتمبر, حياتي قبلك غير حياتي بعدك , مش حاجه وحشه لا سمح الله ,لا يا برنس ابزولوتلي, بس تحس كده بقي فيه خريطه جديده , اي نعم برضه كان فيه صراع زي بتاع الحضارت فى الاول , اه و لا لأ , هنا و لا هناك, مين اللى حيمشي كلمته قققصدي ثقافته بس ربك بيستر و ما يحكمكمش على ولايا مساء الفل يا معلم , يا بلاعة احزاني , يا لهوي عالرومانسيه , بعيد عنك يا خويا , الواحد شاف ايام بنت ستين فى سبعين , كلها غم فى سواد , كان عندي طفح فى الاحزان و الهموم وانت اللى شفطت كل ده و اهى العمليه سلك بوجودك , بلاش بلاعه عشان الريحه , بس برضه كنت شفاط احزان ايييييون , شفاط لكل القرف اللى الواحده مننا بتشوفه مش مهم ايه نوعيه القرف ده بس تحس فى وجودك بيبقي فيه هوا نضيف كده تسمعه و هو داخل يزيق دلوقتي الايام بتفوت صاروخ تحسها خفيفه عالمراوح و لا الشغل اللي كان بيبقي كابس لأ و كله كوم و شغل الشقه كوم تاني , انت عارف يا كبير اني باكرهه عمي بعيد عنك , دلوقتي بابقي مزأططه و انا ماسكه السجاجيد و هات يا ضرب ولا المراتب, زي ماكون بارقص فالس ولا تانجو عارف البلاط و لاسيراميك لما يبقي مدهوس و كله تراب و حد من العيال لاب كوتشي و فيه لبانه لازقه و لا كان بيلعب فى الطين و يوسخه ؟؟؟ انت بقي اللى جبت فرشة البلاط و مرشت و لمعت و بقي سيراميك عمري زي الفل مش حاقولك بقي مقدرش اعيش من غيرك و الكلام اللى ميأكلش عيش ده , يا عم ده كله هجص بس فى الاخر احب اقولك ماتنساش شندوتشات الفول و الطعميه و انت جاي
|
|