لكل عروسة .... ازاى ترصي الصينى ف النيشة

[ندعوك للتسجيل في المنتدى أو التعريف بنفسك لمعاينة هذه الصورة]

النيش ده عبارة عن دولاب ب2 ضلفه او 4 ضلفه حسب حجمه
بيبقى الوش بتاعه زجاج والجوانب زجاج والظهر خشب
لكن فيه مرايه عشان يعكس الضوء
وده بيترص فيه طقم الصيني واطقم الشاي والقهوة والكاسات ....وهكذا
ودي صورته

[ندعوك للتسجيل في المنتدى أو التعريف بنفسك لمعاينة هذه الصورة]

نبدأ بقى طريقه فرشه بسم الله
اولا طبعا لازم تفرشي بالمفارش اللي تبع مفرش السفرة
بيكون في مفارش مربعة صغيرة بتحطيه ويكون نازل منه جزء على شكل مثلث وطبعا بيكون المثلث ده مطرز
بتفرشيه في الوش وفي الجوانب كمان عشان تدي شكل جميل
ودي صورة للتوضيح

[ندعوك للتسجيل في المنتدى أو التعريف بنفسك لمعاينة هذه الصورة]

ثانيا ترتيب الاطقم
حاولي وانتي بتشتري الاطقم متجبيش الوان كتير
يعني بلاش يبقى النيش عبارة عن كرنفال الوان عشان ميزغللش العين
وكمان هتلاقي صعوبه في تنسيقة خصوصا لو المفرش لونه مش لايق مع الطقم
يعني حاولي يبقى الاطقم على قد ماتقدري لون واحد او لونين بالكتير
يعني لو ذهبي يبقى الكاسات فيها خطوط او رسومات دهبي وممكن يكون طقم الشاي على لون عسلي يعني حاولي يبقى الالوان ماشيه مع بعض وطبعا المفارش تكون ذهبي فاتح او بيج
ولو عايزة تكون حاجتك على فضي يبقى دي سهله بالنسبالك ممكن تحطي لون تاني زي الاحمر او الاخضر او الازرق وده هيديكي انعكاس جميل جدا
زي النيش ده عبارة عن لونين فضي وابيض مع احمر

[ندعوك للتسجيل في المنتدى أو التعريف بنفسك لمعاينة هذه الصورة]

طريقة الترتيب بقى طبعا الكاسات واطقم الشربات بيبقوا لوحدهم وترصيهم بشكل جميل لكن بلاش تبالغي وتكتري في الحاجه عشان جمال الاطقم هتروح

وطبعا طقم الشاي بترص كله وبيكون البراد في النص وحواليه الفناجين وبيكون وراه سيرفيس مدور او بيضاوي زي ماتحبي ويكون واقف وراه يعني ساند على خلفيه النيش وممكن كمان تحطي حواليهم فناجين القوة اللي تبع طقم الصيني طبعا عشان يبقو شكل واحد

واطقم الخشاف بيكون الطبق الكبير في النص وبيتحط جواه الاطباق الصغيرة بشكل مرتب وجميل
وطبعا بيكون عندك طقم صواني للتقديم بتكون غير اللي بتستخدميها في المطبخ
ودي بتحطيها في الخلف زي السيرفيس كده اللي اتكلمت عنه من شويه

اما بالنسبه لشنطه الملاعق فليكي حريه الاختيار
ياما بتفتحيها وتحطيها زي ماهي
ياما وده الافضل انك تشيلي الملاعق منها وتضعيها في ادراج البوفيه
طبعا الملاعق بتبقى محطوطه في حاجه كده جوة الشنطه وبتكون لكل واحده مكان مخصص فانتي بتشيليها بيها عشان شكل الملاعق ميبوظش
بالنسبه بقى لباقي طقم الصيني فدول بيترصوا في البوفيه ولو ماعندكيش بوفيه فبترصيهم في النيش من تحت خالص بيكون في مكان متداري
طبعا لان ماينفعش ان الاطباق تبان في النيش
[ندعوك للتسجيل في المنتدى أو التعريف بنفسك لمعاينة هذه الصورة]

ولو عندك اي اطقم زياده من الكاسات او الشربات او قهوة والنيش اتملا خلاص
فممكن ترصيه جوة البوفيه زي مانتي عايزة
وممكن تحطي شويه اكسسوارات حوالين الاطقم لكن بلاش تكتري عشان مفيش احلي من البساطه
وده مثال للاكسسوار

[ندعوك للتسجيل في المنتدى أو التعريف بنفسك لمعاينة هذه الصورة]

[ندعوك للتسجيل في المنتدى أو التعريف بنفسك لمعاينة هذه الصورة]

انا فعلا كنت محتاجه الموضوع ده
ادعولى ربنا يتمملى على خير ان شاء الله
ميرسى همسه

يارب يارب يتمملك علي خير ونفرح بيكى

جميل الموضوع يا همسةرائع فعلا
ياااااااااااااااااااااااااااااااااااااااااااااااااارب يتمملك علي خير يا لولا وتبقي اسعد حد في الدنيا

جمييييييييييييييييييييييييييييييييييييييييييييييل همسه تسلم ايدك فعلا موضوع جامد جدا
ميرسى ليكى
ربنا يتمم لك بألف خير يا لولا ويوفقك يا رب
[ندعوك للتسجيل في المنتدى أو التعريف بنفسك لمعاينة هذه الصورة]

هيييييييييييييييييييييييييييييييه
ناس كتيره بتدعيلى ربنا يخليكو ليا
[ندعوك للتسجيل في المنتدى أو التعريف بنفسك لمعاينة هذه الصورة]